काठमाडौं,
यतिबेला नेपाली फिल्म क्षेत्रका मियो हुन्, दयाहाङ राई । उनकै वरिपरि फिल्म क्षेत्र घुमेको छ । यस वर्ष घोषणा भएका फिल्मदेखि प्रदर्शन हुन लागेका फिल्मसम्म प्रायः दयाहाङका छन् ।
अहिले उनको नियति कस्तो आएको छ भने आफ्नै फिल्म भिड्न थालेका छन् । गत बैशाख १ गते ‘जारी’ र ‘बिहे पास’बीच भिडन्त भएको थियो । अब यही माघ २६ मा ‘हात्तीछाप’ र ‘दयारानी’ भिड्दैछन् ।
आफ्नै फिल्म एउटै मितिमा रिलिज हुनुलाई दयाहाङले नयाँ अनुभव मानेका छन् । आफूले धेरै फिल्ममा काम गरेकाले यो अवस्था आएको पनि उनको स्वीकारोक्ति छ । उनी भन्छन्, ‘यस वर्ष दुईटा मितिमा गरि मेरो चारवटा फिल्म प्रदर्शनमा आए ।
यसले मलाई अर्को अनुभव बटुल्ने मौका दिएको छ । मैले अलि बढी नै फिल्म गरेका कारणले पनि यो अवस्था आएको हो कि भन्ने लागेको छ ।’
फिल्म नगरुम् भन्ने अवस्था पनि नरहेको उनको तर्क छ । काम गर्नैपर्ने बाध्यता रहेको उनी बताउँछन् । तर, अबको एक वर्ष नयाँ फिल्म सम्झौता गर्ने सोचमा उनी छैनन् ।
उनी भन्छन्, ‘मैले तत्काल नयाँ फिल्म साइन गर्न मानेको छैन । अब जति पनि फिल्ममा मैले काम गर्नुपर्नेछ, त्यो एक/डेढ वर्ष अगाडि नै सम्झौता गरेको थिएँ । सम्भवतः अबको एक वर्षसम्म नयाँ फिल्म साइन गर्दिनँ ।’
नयाँ फिल्म सम्झौता नगरे पनि घोषणा हुन ५ वटा फिल्म अझै बाँकी रहेको दयाहाङले खुलासा गरेका छन् । ‘घोषणा नभएका तर मैले काम गर्ने वचन दिएका अझै ५ वटा फिल्म छन् ।
ती फिल्म कुनै दिन घोषणा हुन सक्छन्, त्यसबेला फेरि नयाँ फिल्म सम्झौता गरेछ भन्ने चाहिँ नपरोस्,’ उनले स्पष्ट पारे । अहिले उनलाई आफ्नो ‘पाइपलाइन’मा कतिवटा फिल्म छन् भन्ने समेत कन्ठस्थ छैन ।
एकसाथ प्रदर्शन हुन लागेका ‘हात्तीछाप’ र ‘दयारानी’ वर्षौंपछि हेर्दा पनि ताजगी लाग्ने दयाहाङको विश्वास छ । उनी भन्छन्, ‘बनेको हिसाबले ‘दयारानी’ पुरानो हो । यो फिल्म ५ वर्ष अगाडि नै बनेको थियो । तर, यसको कथा वर्षौंसम्म पनि ताजा रहन्छ भन्ने मलाई लाग्छ । ‘हात्तीछाप’ पनि वर्षौंसम्म ताजा रहिरहँला ।
यी दुईवटै फिल्मको स्वाद फरक छ । त्यसैले दर्शक पनि फरक हुन सक्छन् ।’
