काठमाडौं,
अभिनेता दयाहाङ राई र अभिनेत्री मिरुना मगरले लगातार फिल्ममा काम गरिरहेका छन् । अघिल्लो वर्ष मात्र उनीहरुको तीनवटा फिल्म ‘जारी’, ‘नाङ्गो गाउँ’ र रंगेली’ रिलिज भए ।
यतिबेला यो जोडीको ‘मनसरा’ हलमा प्रदर्शनरत छ । अब आगामी असार २८ गतेबाट उनीहरुको अर्को नयाँ फिल्म ‘घरज्वाइँ’ प्रदर्शनमा आउने तयारीमा छ । आइतबार यो फिल्मको टिजर सार्वजनिक गरियो ।
१ मिनेट ५७ सेकेण्ड लम्बाईको टिजरले दयाहाङ र मिरुनाबीचको सम्बन्धलाई देखाएको छ । शिक्षण पेशामा आबद्ध दयाहाङको पात्रले मिरुनालाई मन पराउँछ । जब बिहेको कुरा गर्न ऊ मिरुनाको घर जान्छ, तब मिरुनाका पिता (शिशिर बाङ्गदेल)ले घरज्वाइँ बस्नुपर्ने सर्त अगाडि सार्छन्, जुन स्वीकार्न ऊ तयार छैन ।
फिल्मले घरज्वाइँ संस्कृतिको कथालाई उठाएको टिजरले छनक दिन्छ ।
अनिल बुढा मगरको निर्देशनमा बनेको फिल्ममा बुद्धि तामाङ, पुष्कर गुरुङ, भोलाराज सापकोटा, कविता आले, शिला आले, राज थापा, खड्कबहादुर पुन (खबपु), अनु थापा, विना थापा मगर, सोनाम लामा, विवेश बुढा मगर, सुनिल मगरको पनि अभिनय छ । जनक घर्ती मगरको निर्माण रहेको फिल्मलाई सुशन प्रजापतिले छायांकन गरेका हुन् । पूर्वी रुकुम जिल्लामा फिल्म खिचिएको हो ।
जिएम मुभीज र एबीएम सिनेमा प्रोडक्सनको ब्यानरमा निर्माण भएको फिल्मको कथा निर्देशक मगर स्वयंले लेखेका हुन् । पटकथा तथा संवाद लेखनमा भने उनलाई विनोद खतिवडा र सुभाष कोइरालाले सघाएका छन् ।
हर्क साउद र राम अविरल विष्टको शब्द रचना तथा मनोज थापा र एसडी योगीको संगीत रहेको फिल्मलाई नेपालमा वितरण गर्ने अधिकार आरआर फिल्म्सले लिएको छ ।
फिल्मीखबर,
