विराटनगर । कोशी नाम खारेजी र प्रदेशको पुनः संरचनाको माग राख्दै राष्ट्रिय मुक्ति क्रान्तिले पूर्वी नेपालको विराटनगरमा प्रदर्शन गरेको छ ।
शुक्रबार राजेन्द्र महतो संयोजक रहेको राष्ट्रिय मुक्ति क्रान्ति पूर्वी कमान्डले प्रदेशको संरचना पुनः संशोधन गर्नुपर्ने माग गर्दै प्रदर्शन गरेको हो ।
कोणसभालाई सम्बोधन गर्दै राष्ट्रिय मुक्ति क्रान्ति मोर्चाका संयोजक राजेन्द्र महतोले कोशीले पहिचान मागेको नभई लिम्बू, खम्बु, कोचिला, मधेसका जनताले पहिचान मागेको बताए । महतोले राष्ट्रिय मुक्ति क्रान्तिले शान्तिपूर्ण आन्दोलन गर्दै नेपाललाई सबै नेपालीको राज्यको रूपमा स्थापित गर्ने उनको भनाइ थियो ।
उनले भने, ‘विगतमा केहीले विगतमा जबरजस्ती गोली चलाएर मधेस आन्दोलनको अन्त्य गर्ने प्रयत्न गरे । बन्दुक चलाएरै संविधान जारी गरे । विडम्बना त्यो संविधानमा जनताका समस्या लेखिएनन् । अन्ततः मधेस आन्दोलन सफल भयो ।
हामीले केही गर्न खोज्दा यो नस्लवादी शासकसँग सकेनौँ । हामी सबै पहिचानवादी यी शासकसँग निरीह बन्न पुग्यौँ ।’
अहिलेसम्म सात वटा संविधान बनेका भए पनि नेपाली जनताले आफ्नो पहिचान र अधिकार नपाएको उनको भनाइ थियो ।
