![](https://khabarpostonline.com/wp-content/uploads/2024/06/mechi-udhyog.gif)
चीनले पहिलोपटक अक्सिजन मिश्रित तरल मिथेनबाट चल्ने विश्वकै पहिलो रकेटको सफलतापूर्वक परीक्षण गरेको छ ।
जुलाई १२ बुधबारको दिन चीनको एक निजी कम्पनीले विश्वकै पहिलो मिथेन-लिक्विड अक्सिजन रकेट लञ्च गरेको हो ।
योसँगै चीन मिथेन र तरल अक्सिजनबाट चल्ने रकेट तयार गर्ने पहिलो देश बनेको छ । यस्तो खालको रकेट बनाउने प्रयास अमेरिकाले पनि गरिरहेको थियो तर चीनले सुरुमा बाजी मार्न सफल भयो ।
उत्तर पश्चिम चीनको जियुकुआन स्याटेलाइट सेन्टरबाट बुधबार बिहान ९ बजे रकेट प्रक्षेपण गरिएको हो ।
सो रकेटको नाम जूक्यू टू क्यारिअर रकेट रहेको छ । रकेटले निर्धारित मापदण्ड अनुरुप आफ्ना सबै टार्गेट पूरा गर्न सफल भएको छ ।
बेइजिङस्थित निजी अन्तरीक्ष कम्पनी ल्याण्डस्पेसले दोस्रो प्रयासमा यो रकेट तयार पारेको हो । उसले गत वर्ष डिसेम्बरमा गरेको पहिलो प्रयास भने विफल भएको थियो ।
यो सफलतासँगै अब अन्तरिक्षयान प्रक्षेपणमा नयाँ पुस्ताको रकेटको विकास भएको छ ।
बुधबारको सफलतासँगै चीन मिथेन इन्धनयुक्त रकेट निर्माणमा अमेरिकालाई पछि पार्न सफल भएको छ ।
एलन मस्कको स्पेस एक्स र जेफ बेजोसको ब्लु ओरिजिनलाई पनि चिनियाँ कम्पनीले पछि पारेको छ ।
रकेट इन्धनमा मिथेनको प्रयोगलाई कम प्रदूषकका साथै सुरक्षित, सस्तो र पुनःप्रयोग गरिने रकेटमा उपयुक्त प्रोपेलेन्ट मानिन्छ ।
स्मरण रहोस् चिनिया अन्तरिक्ष कम्पनी ल्याण्डस्पेस तरल प्रोपेलेन्ट रकेट प्रक्षेपण गर्ने दोस्रो चिनियाँ कम्पनी पनि बनेको छ ।
यसअघि गत अप्रिल महिनामा अर्को चिनियाँ निजी कम्पनी बेइजिंग तियानबिंग टेक्नोलोजीले मटि्टतेल-अक्सिजन रकेट प्रक्षेपण गरेको थियो । यसले इन्धनको पुनःभरण तथा पुनः प्रयोग गर्ने रकेटको विकासमा नयाँ फड्को मारेको थियो ।
चीन सरकारले सन् २०१४ मा अन्तरिक्ष विज्ञानको उद्योगमा निजी क्षेत्रलाई पनि लगानी खुल्ला गरेसँगै व्यवसायिक अन्तरिक्ष कम्पनीहरुले यो क्षेत्रमा ठूलो लगानी र प्रतिफल हासिल गरिरहेका छन् ।
ल्याण्डस्पेस पनि सबैभन्दा सुरुमा र उत्कृष्ट लगानी रहेको कम्पनी मध्ये एक हो ।
onlinekhabar