काठमाडौं । दशैंसँगै काठमाडौँ उपत्यका सुनसान भएको छ । अधिकांश मानिस दशैं मनाउन उपत्यका बाहिर गएपछि काठमाडौँमा सुनसान भएको हो । अन्य समयमा व्यस्त हुने काठमाडौंका सडक सुनसान भएका छन् भने सार्वजनिक यातायात पनि कम मात्र चलेको पाइन्छ ।
दशैं लागेपछि काठमाडौँबाट दैनिक १ लाखसम्म यात्रु बाहिरिएका थिए । उपत्यका ट्राफिक प्रहरी कार्यालयका अनुसार आइतबारसम्म उपत्यकाबाट झण्डै ११ लाख मानिस बाहिरिएको अनुमान छ ।
दशैं मनाउन धेरैजसो उपत्यका बाहिर गएको अवसरमा काठमाडौंका हुन सक्ने आपराधिक घटनाको निगरानीका लागि विशेष सुरक्षा योजना बनाएको प्रहरीले जनाएको छ । व्यस्त रहेर भ्याइ नभ्याई हुने ट्राफिक प्रहरीलाई अहिले दशैंको अवसरमा भने ट्राफिक व्यवस्थापनको झन्झट कम भएको छ ।
उता गाउँ घरमा भने दसैँ भित्रिएसँगै रमझम छाएको छ , कमेरो र रातो माटोले पोटेको घर , साथीभाइ आफन्त बिचको भेटघाट, बारीको कान्लामा फुलेको ढकमक्क सयपत्री फूल , आकाशमा स्वतन्त्र गडेका चङ्गाहरू र घर–आँगन सफा सुग्घर गरेपछि गाउँघरमा दसैँ आएको छनक मिल्छ । यसै गरी गाउँघरमा तब दशैंको रौनक सुरु हुन्छ, जब ठाउँ–ठाउँमा पिङ हाल्न थालिन्छ।
दसैँ परम्परासँग जोडिएका चङ्गा, पिङ मनोरञ्जनका माध्यम हुन् । यद्यपि यसको महिमा मनोरञ्जनमा मात्र सीमित छैन । चङ्गाले मौसमी अवस्थाबारे पनि जानकारी दिन्छ । चङ्गा उडाउनु भनेको खुला र मोहक मौसमको सूचक हो । चङ्गा उडाउन मन्द हावाको बहाव चाहिन्छ।
