![](https://khabarpostonline.com/wp-content/uploads/2024/06/mechi-udhyog.gif)
झापा । भद्रपुर–८ स्थित प्रादेशिक अस्पताल आसपास आगामी भदौ १ गतेदेखि सुर्तीजन्य पदार्थ तथा मदिरा बेचबिखनमा प्रतिबन्ध लगाइने भएको छ । भद्रपुर नगरपालिका ८ नम्बर वडा कार्यालयले आफ्नो वडामा पर्ने प्रादेशिक अस्पताल लक्षित गरी पहिलो चरणमा अस्पताल आसपासको १०० मिटर (सार्वजनिक स्थल)मा सूर्तीजन्य पदार्थ तथा मदिरा बेचबिखनमा प्रतिबन्ध लगाउन लागेको हो । वडा कार्यालयले सो अभियान सफल बनाउन मंगलवारदेखि सन्देश तथा जनचेतनामूलक अभियान शुरु गरेको छ ।
वडा कार्यालयले नेपाल रेडक्रस सोसाइटी झापा शाखाको भवनमा सूर्तीजन्य तथा मादक पदार्थ निषेधित क्षेत्र घोषणा तयारी बैठक सम्पन्न गरेपश्चात् अस्पताल वरिपरिको सडकमा होर्डिङ बोर्ड लगाउनुका साथै स्टिकर टाँस गरिसकेको छ । प्रदेश सांसद मोहन महर्जनको प्रमुख आतिथ्यमा भएको तयारी बैठकमा नगर प्रमुख गणेश पोखरेलले नगर क्षेत्रमा वडा नम्बर ८ बाट यो अभियान शुरु भएको जानकारी गराए ।
अब नगरपालिकाले नीति बनाएर नगरभरिका सार्वजनिकस्थलमा सूर्तीजन्य तथा मादक पदार्थ निषेधित अभियान छिट्टै सञ्चालन गर्ने उनले बताए । सूर्तीजन्य तथा मादक पदार्थ अभियान सफल बनाउन नगरको पाठ्यक्रममा पनि यसलाई समावेश गरिने उनको भनाइ छ । त्यस्तै नगर उपप्रमुख राधा कार्कीले कानून बने पनि सार्वजनिक स्थलमा सूर्तीजन्य तथा मादक पदार्थ अझै पनि बिक्री वितरण भइरहेकोले यसको नियन्त्रण तथा रोकथामका लागि नगरपालिका लागीपर्ने बताइन् ।
त्यस्तै वडाध्यक्ष गौरव सुब्बाले पहिलो चरणमा अस्पताल लक्षित गरी यो अभियानको सुरुवात गरेको बताए । ‘म लागेँ भने लागँ–लागेँ, यो अभियान सफल बनाएरै छाड्छु’– उनले भने– ‘सूर्तीजन्य तथा मादक पदार्थ निषेधित क्षेत्रमा बिक्री तथा सेवन गर्ने दुवै पक्षलाई कानून बमोजिम कारबाही गरिन्छ ।’ ‘यो अभियान सफल बनाउन सबैको साथ र सहयोग चाहिन्छ’– उनले भने ।
बैठकमा अधिवक्ता कुलप्रसाद दाहालले सूर्तीजन्य पदार्थ नियन्त्रण तथा रोकथाम ऐन २०६८को बारेमा जानकारी गराउँदै १८ वर्ष नपुगेकाले सूर्तीजन्य तथा मदिरा बिक्री तथा सेवन गर्नु हुँदैन । १८ वर्ष मुनिका बालबालिकाले सूर्तीजन्य तथा मदिरा बिक्री तथा सेवन गरेमा दुवैलाई कानून बमोजिम कारबाही हुने ऐनमा उल्लेख भएको अधिवक्ता दाहालले बताए ।