![](https://khabarpostonline.com/wp-content/uploads/2024/06/mechi-udhyog.gif)
बिर्तामोड । झापाको बिर्तामोडमा चलचित्र महोत्सव २०८१ हुने भएको छ । कोशी प्रदेशको कला, संस्कृति तथा मनमोहक स्थलहरुको प्रवर्धन गर्ने उद्देश्यसाथ महोत्सव हुन लागेको हो । कोशी प्रदेशमा पहिलोपटक चलचित्र महोत्सव हुन लागेको बिर्तामोडमा आज पत्रकार सम्मेलन गरेर महोत्सवबारे जानकारी दिइएको हो ।
![](https://khabarpostonline.com/wp-content/uploads/2024/04/1-1.gif)
स्थानीय व्यवस्थापक नेपाल चलचित्रकर्मी संघ कोशी प्रदेशका अनुसार महोत्सव यही जेठ ६ गतेदेखि ११ गतेसम्म हुनेछ ।
कोशी प्रदेशका मुख्यमन्त्री हिक्मतकुमार कार्कीले बिर्तामोडमा उद्घाटन गर्ने महोत्सवमा विभिन्न जाति तथा समुदायका सांस्कृतिक झाँकी प्रदर्शन गरिने अध्यक्ष केवल तामाङले जानकारी दिए ।
![](https://khabarpostonline.com/wp-content/uploads/2024/04/mechi-udhyog.gif)
कोशी प्रदेशमा चलचित्र क्षेत्रमा लगानी वृद्धि एवम् चलचित्र क्षेत्रको विकासमा गर्नुपर्ने कामहरुको विषयमा जानकारी दिने उद्देश्यले आयोजना हुने महोत्सवको समापन विराटनगरमा हुने महासचिव रमेश तिवारीले जानकारी दिए ।
चलचित्रले प्रदेशलाई पर्यटनसँग जोडेर ठुलो आम्दानीको स्रोतको रुपमा विकास गरेर आर्थिक रुपमा मजबुत बनाउन सक्ने महोत्सवले विश्वास लिएको छ ।
चलचित्र क्षेत्रमा विकास भएका नयाँ प्रविधि, सिर्जना, सीप, कला र शैलीका बारेमा अध्ययन तथा अनुसन्धान गर्न, विभिन्न मुलुकबीच चलचित्रको माध्यमबाट सांस्कृतिक क्षेत्रको अनुभव आदानप्रसाद गर्न वा संयुक्त रुपमा लगानी गरी चलचित्र निर्माण गर्ने काममा उत्प्रेरित गर्ने महोत्सवको उद्देश्य रहेको छ ।
महोत्सवको आयोजना आन्तरिक मामिला तथा कानुन मन्त्रालय कोशी प्रदेशले गरेको हो ।
![](https://khabarpostonline.com/wp-content/uploads/2024/05/final-2-1024x682.gif)